Një seancë dëgjimore në Kongresin Amerikan u kthye në një përballje të tensionuar mes Prokurores së Përgjithshme të SHBA-së, Pam Bondi, dhe ligjvënësve demokratë, me fokus trajtimin dhe publikimin e dokumenteve lidhur me çështjen Jeffrey Epstein.
Debati shpërtheu për shkak të publikimit të konsideruar të dështuar të dosjeve nga Departamenti i Drejtësisë, veçanërisht për mënyrën si u trajtuan emrat e viktimave. Demokratët akuzuan departamentin për mungesë ndjeshmërie dhe transparence, duke theksuar se ndërsa u redaktua gjerësisht informacioni për individë të tjerë të përmendur në dokumente, nuk u tregua i njëjti kujdes për mbrojtjen e viktimave.
Gjatë seancës, Bondi nuk pranoi të përballej drejtpërdrejt me të mbijetuarit e Epstein, të cilët ndodheshin të ulur pas saj, edhe pse iu kërkua të kërkonte falje për trajtimin e çështjes. Në fjalën e saj hapëse, ajo u shpreh se i vinte “thellësisht keq” për vuajtjet e viktimave dhe i inkurajoi ato të raportojnë abuzimet tek autoritetet ligjzbatuese.
Tensionet u shtuan kur përfaqësuesja demokrate nga Uashingtoni, Pramila Jayapal, u kërkoi të mbijetuarve që nuk kishin pasur mundësi të takoheshin me zyrtarët e Departamentit të Drejtësisë të ngriheshin dhe të ngrinin dorën – gjë që u bë nga shumë prej grave të pranishme.
E sfiduar për reagim, Bondi u përgjigj shkurt: “Nuk do të kritikoj ashpër sjelljet e saj teatrale”, duke e cilësuar veprimin si një akt simbolik politik.
