Administrata e Presidentit amerikan Donald Trump po shton ndjeshëm praninë ushtarake në Lindjen e Mesme, ndërsa negociatat për programin bërthamor iranian vijojnë pa një marrëveshje konkrete në horizont.
Sipas raportimeve të Axios, SHBA ka mobilizuar forca të konsiderueshme në rajon, përfshirë dy aeroplanmbajtëse, dhjetëra anije luftarake, qindra avionë luftarakë si F-35, F-22 dhe F-16, si dhe sisteme të shumta të mbrojtjes ajrore. Mbi 150 fluturime transporti kanë dërguar pajisje dhe armatime në javët e fundit.
Ndërkohë, këshilltarët e Trump, Jared Kushner dhe Steve Witkoff, zhvilluan një takim treorësh në Gjenevë me ministrin e Jashtëm iranian, Abbas Araghchi. Të dyja palët e cilësuan raundin e fundit si “progres”, por pranuan se dallimet mbeten të thella.
Zëvendëspresidenti J. D. Vance deklaroi se Trump preferon një zgjidhje diplomatike, por nuk përjashton mundësinë që diplomacia të ketë arritur limitin e saj.
Burime pranë qeverisë izraelite sinjalizojnë përgatitje për skenarë të ashpër, që përfshijnë goditje ndaj infrastrukturës bërthamore dhe raketore të Iranit. Sipas të njëjtave raportime, një konflikt i mundshëm mund të shpërthejë brenda javësh nëse negociatat dështojnë.
Edhe pse kanalet diplomatike mbeten të hapura, ekspertët paralajmërojnë se situata është delikate dhe çdo përshkallëzim mund të ketë pasoja të gjera për rajonin dhe për presidencën e Trump në vitet e mbetura të mandatit.
