Sekretari i Shtetit të SHBA-ve, Marco Rubio ka reaguar me tone të ashpra për futjen e dronëve rus në hapësirën ajrore të Polonisë. Ai u shpreh se hyrja e dronëve ushtarakë në hapësirën ajrore polake, ishte e papranueshme.
E paqarta vijon të mbetet nëse Rusia i ka dërguar qëllimisht ato dronë në territorin e Polonisë.
“Ne mendojmë se është një zhvillim i papranueshëm, i pafat dhe i rrezikshëm. Pa dyshim: dronët u lëshuan qëllimisht. Pyetja është nëse dronët ishin synuar të shkonin konkretisht në Poloni.“
Rubio tha se nëse dronët ishin në shënjestër të Polonisë, “nëse provat na çojnë atje, atëherë padyshim që ky do të jetë një veprim shumë përshkallëzues. Ekzistojnë edhe një numër mundësish të tjera, por mendoj se do të donim të kishim të gjitha faktet dhe të konsultoheshim me aleatët tanë përpara se të merrnim vendime specifike“, shtoi ai.
Të premten, Polonia hodhi poshtë sugjerimin e Presidentit të SHBA-së Donald Trump se inkursionet mund të kenë qenë një gabim, një kundërshtim i rrallë i presidentit të SHBA-së nga një prej aleatëve më të ngushtë evropianë të Uashingtonit. Ministri i saj i jashtëm i tha Reuters se Polonia shpresonte që Uashingtoni të ndërmerrte veprime për të treguar solidaritet me Varshavën.
Ndërkohë, Rusia është shprehur se forcat e saj kishin sulmuar Ukrainën në kohën e sulmeve me dronë dhe se nuk kishte ndërmend të godiste objektiva në Poloni.
