Zyra e Prokurorit Publik në Berlin ka ngritur aktakuzë ndaj ish-ministrit të Transportit, Andreas Sauer, dhe ish-ministrit të Shtetit, Gerhard Schulz, nën dyshimin se kanë dhënë dëshmi të rreme para një komisioni hetimor parlamentar. Hetimet kanë zgjatur tre vjet dhe, sipas autoriteteve, të dy ish-zyrtarët mund të përballen me dënime deri në pesë vjet burg.
Rasti lidhet me projektin e shumëpërfolur për vendosjen e një takse ndaj shoferëve të huaj që përdorin autostradat gjermane. Ky plan u konsiderua që në fillim i paligjshëm nga shumica e ekspertëve dhe u rrëzua më vonë nga Gjykata Evropiane e Drejtësisë. Vetëm procedurat dhe kompensimet i kushtuan shtetit gjerman mbi 240 milionë euro.
Sipas akuzës, Sauer nuk ka thënë të vërtetën gjatë dëshmisë së tij në komisionin që po hetonte përgjegjësitë politike për dështimin e projektit. Megjithëse ideatori i taksës ishte paraardhësi i tij në ministri, Alexander Dobrindt, aktualisht ministër i Brendshëm në qeverinë e Friedrich Merz, Sauer akuzohet se ka shmangur përgjegjësitë e veta si pasardhës në zbatim.
Ky zhvillim pritet të ndezë debat të ri në politikën gjermane mbi transparencën dhe llogaridhënien e zyrtarëve të lartë në projekte që kanë shkaktuar kosto të mëdha financiare për shtetin.
