Përveç yjeve në fushë, kombëtarja spanjolle duket se ka fituar edhe një “hajmali” të veçantë. Bëhet fjalë për Keyne, vëllain e vogël të Lamine Yamal, i cili është kthyer në një nga figurat më të dashura për tifozët e “Furisë së Kuqe”.
Gjatë fitores së Spanjës ndaj Belgjikës, në një stadium me rreth 70 mijë spektatorë, një moment i pazakontë tërhoqi vëmendjen e të gjithëve. Në ekranet gjigante u shfaq Keyne, i cili do të mbushë katër vjeç në shtator, duke bërë një mimikë qesharake. Reagimi i tifozëve ishte i menjëhershëm dhe momenti u bë viral.
Gazeta franceze L’Equipe shkroi se vogëlushi nuk bëri asgjë të jashtëzakonshme, përveç një fytyre qesharake që fitoi menjëherë simpatinë e publikut.
Vetë Lamine Yamal zbuloi se vëllai i tij e kishte paralajmëruar për këtë moment.
“Isha te fizioterapisti kur më telefonoi nga telefoni i nënës sime për të më thënë se do ta nxirrte gjuhën jashtë,” rrëfeu futbollisti i Barcelonës.
Prania e Keyne në stadium ka marrë edhe një kuptim simbolik për tifozët spanjollë. Sipas tyre, sa herë që vogëlushi ndodhet në tribunë, Spanja arrin të fitojë.
Gazetari Ben Fernandes Santos deklaroi për L’Equipe se Keyne është kthyer tashmë në “hajmalinë” e kombëtares.
“Sa herë që ai është në stadium, Spanja fiton. E pamë këtë edhe gjatë Kampionatit Evropian dhe që atëherë është bërë hajmalia jonë me fat,” u shpreh ai.
Tashmë, ndërsa Spanja përgatitet për gjysmëfinalen ndaj Francës, shumë tifozë shpresojnë që Keyne të jetë sërish në tribunë, duke besuar se prania e tij mund t’i sjellë edhe një herë fat skuadrës iberike.
