Sekretari i Përgjithshëm i NATO-s, Mark Rutte, ka deklaruar se presidenti amerikan Donald Trump kishte të drejtë kur ngriti shqetësimin për rëndësinë strategjike të Groenlandës dhe nevojën për të forcuar sigurinë në rajonin e Arktikut.
Gjatë një deklarate për mediat, Rutte tha se ekziston një rrezik real që Rusia të zgjerojë ndikimin e saj në Arktik, duke e bërë këtë rajon një nga pikat më të ndjeshme të sigurisë ndërkombëtare.
“Kur diskutuam për mbrojtjen e Arktikut, Trump kishte të drejtë. Ekziston një rrezik i madh që Rusia të rrisë influencën e saj në këtë rajon”, u shpreh kreu i NATO-s.
Sipas tij, aleatët kanë rënë dakord që shtatë vendet e NATO-s me dalje në Arktik të mbështeten nga partnerët europianë, me qëllim garantimin e sigurisë dhe stabilitetit në këtë zonë me rëndësi strategjike.
Megjithatë, Rutte sqaroi se çështja e statusit të Groenlandës dhe çdo vendim që lidhet me të ardhmen e ishullit nuk është kompetencë e NATO-s, por duhet të zgjidhet përmes dialogut mes Shteteve të Bashkuara, Groenlandës dhe Danimarkës.
Ai theksoi se çdo diskutim mbi investimet në projekte mbrojtëse, përfshirë sistemet e mbrojtjes si “Kupola e Hekurt”, apo mbi një ndryshim të mundshëm të statusit kushtetues të Groenlandës, u takon ekskluzivisht palëve të përfshira.
“Roli im është të punoj me udhëheqësit ushtarakë për të forcuar mbrojtjen e Aleancës dhe pikërisht këtë po bëjmë”, përfundoi Rutte.
Deklaratat e sekretarit të përgjithshëm të NATO-s vijnë në një kohë kur Arktiku po fiton gjithnjë e më shumë rëndësi gjeopolitike, për shkak të burimeve natyrore, rrugëve të reja detare dhe konkurrencës në rritje mes fuqive të mëdha botërore.
