Sekretari i Përgjithshëm i NATO-s, Mark Rutte, ka konfirmuar zyrtarisht se samiti i ardhshëm i Aleancës së Atlantikut të Veriut do të mbahet në Shqipëri.
Njoftimi u bë gjatë konferencës për shtyp në përfundim të Samitit të NATO-s në Ankara, ku liderët e vendeve anëtare diskutuan mbi forcimin e sigurisë euroatlantike, rritjen e investimeve në mbrojtje, luftën në Ukrainë, tensionet në Lindjen e Mesme dhe sfidat e reja me të cilat përballet Aleanca.
Rutte e cilësoi organizimin e samitit në Shqipëri si pjesë të angazhimit të NATO-s për të forcuar bashkëpunimin mes vendeve anëtare dhe për të vlerësuar kontributin e secilit aleat në sigurinë kolektive.
Për Shqipërinë, pritja e samitit përbën një moment historik dhe një vlerësim të rëndësishëm për rolin e saj brenda Aleancës. Vendi, i cili është anëtar i NATO-s që prej vitit 2009, do të presë për herë të parë takimin më të lartë politik të organizatës, ku do të mblidhen krerët e shteteve dhe qeverive të vendeve anëtare.
Samiti pritet të sjellë në Shqipëri liderët më të rëndësishëm të botës perëndimore dhe delegacione të nivelit të lartë, duke e vendosur vendin në qendër të vëmendjes ndërkombëtare për çështjet e sigurisë dhe mbrojtjes.
