Gjykata e Lartë e Shteteve të Bashkuara i ka dhënë një goditje të rëndësishme presidentit Donald Trump, duke rrëzuar përpjekjen e tij për të kufizuar të drejtën automatike të shtetësisë amerikane për fëmijët e lindur në territorin amerikan.
Me një vendim 6 me 3, gjyqtarët vendosën se çdo person i lindur në Shtetet e Bashkuara vazhdon të gëzojë të drejtën kushtetuese për shtetësinë amerikane, pavarësisht statusit ligjor të prindërve të tij, qoftë ata emigrantë pa dokumente apo vizitorë të përkohshëm.
Vendimi lë në fuqi interpretimin e Nenit të 14-të të Kushtetutës amerikane, një parim që prej më shumë se 150 vitesh garanton shtetësinë për çdo fëmijë të lindur në territorin e SHBA-së.
Presidenti Donald Trump reagoi menjëherë përmes platformës së tij Truth Social, duke e cilësuar vendimin si “një lajm të keq për vendin”. Ai u bëri thirrje republikanëve në Kongres që të ndërmarrin nisma ligjore për t’i dhënë fund kësaj praktike përmes miratimit të një ligji federal, pa qenë e nevojshme të ndryshohet Kushtetuta.
Ky vendim konsiderohet një tjetër pengesë e rëndësishme për axhendën e Trumpit mbi emigracionin. Pavarësisht se Gjykata e Lartë ka shumicë gjyqtarësh me prirje konservatore, ajo vendosi të mbështesë interpretimin tradicional të Kushtetutës dhe të ruajë një nga parimet më të rëndësishme të sistemit juridik amerikan.
Që prej nisjes së mandatit të tij të dytë presidencial, disa nga nismat më të debatueshme të Donald Trump për emigracionin dhe kontrollin kufitar janë përballur me kundërshtime të forta në sistemin gjyqësor, duke treguar se institucionet amerikane vijojnë të ushtrojnë kontroll kushtetues mbi vendimet e administratës.
