Kryeministri i Izraelit, Benjamin Netanyahu, i është përgjigjur deklaratave të fundit të presidentit turk, Rexhep Tajip Erdogan, duke i kërkuar që të ulë tonet e retorikës dhe duke theksuar se Izraeli nuk do të lejojë asnjë kërcënim ndaj sigurisë apo ekzistencës së tij.
Në një intervistë për televizionin izraelit Channel 14, Netanyahu shprehu shqetësim për, siç tha ai, përshkallëzimin e gjuhës politike të Ankarasë ndaj shtetit izraelit.
Sipas tij, zhvillimet në rajon lidhen me ndryshimet e ekuilibrave të fuqisë në Lindjen e Mesme, duke përmendur Iranin dhe Turqinë si dy pole me ndikim të ndryshëm ideologjik dhe politik.
Netanyahu gjithashtu komentoi deklaratat e Erdoganit për Jerusalemin, duke i kujtuar presidentit turk se “400 vitet e Perandorisë Osmane kanë përfunduar” dhe se sot ekziston një shtet sovran dhe i fuqishëm i Izraelit me institucionet e tij shtetërore dhe ushtarake.
“Ai do të bënte mirë të qetësohej,” u shpreh kryeministri izraelit, duke theksuar se Izraeli ka kapacitete të plota për të mbrojtur veten dhe nuk do të tolerojë asnjë kërcënim ndaj sigurisë kombëtare.
Netanyahu shtoi gjithashtu se Izraeli është i vendosur të reagojë ndaj çdo rreziku të mundshëm, duke nënvizuar forcën e ushtrisë dhe unitetin e institucioneve të vendit.
Deklaratat e tij vijnë në një klimë të tensionuar mes Izraelit dhe Turqisë, të karakterizuar nga shkëmbime të forta politike dhe retorikë të ashpër, veçanërisht për çështjen e Jerusalemit dhe zhvillimeve në rajon.
Në të njëjtën intervistë, kryeministri izraelit komentoi edhe marrëdhëniet me Egjiptin, duke bërë të ditur se ka zhvilluar kontakte për çështje të sigurisë dhe respektimin e marrëveshjeve ekzistuese, pa dhënë detaje të mëtejshme.
Ai përfundoi duke theksuar se situata gjeopolitike në Lindjen e Mesme mbetet dinamike dhe se Izraeli duhet të ruajë dhe forcojë vazhdimisht pozicionin e tij strategjik në rajon.
