Një konflikt i ashpër për çështje pronësie ka përfunduar me pesë persona të arrestuar në Tiranë, mes tyre edhe ish-drejtori i Policisë së Vlorës, Sokol Mulosmani.
Ngjarja u regjistrua në rrugën “Nazmi Leka”, ku, sipas burimeve paraprake, një mosmarrëveshje e hershme mes anëtarëve të së njëjtës familje për pronësinë e një pasurie ka degjeneruar në përplasje fizike.
Sipas të dhënave të para, në konflikt janë përfshirë Sokol Mulosmani dhe tre vëllezërit e tij, ndërsa në vendngjarje ndodhej edhe një nip i familjes. Debati mes tyre është përshkallëzuar me shpejtësi, duke bërë të nevojshme ndërhyrjen e forcave të Policisë.
Menjëherë pas marrjes së njoftimit, shërbimet policore mbërritën në vendin e ngjarjes, duke ndërhyrë për të neutralizuar situatën dhe për të shmangur përshkallëzimin e mëtejshëm të konfliktit.
Si rezultat i ndërhyrjes, policia arrestoi pesë persona, përfshirë ish-drejtorin e Policisë së Vlorës, ndërsa të gjithë janë shoqëruar në komisariat për veprimet procedurale.
Burime nga grupi hetimor bëjnë me dije se konflikti lidhet me pretendimet mbi pronësinë e një pasurie, ndërsa po merren në pyetje të gjithë personat e përfshirë për të sqaruar plotësisht rrethanat e ngjarjes dhe rolin e secilit në incident.
Policia dhe Prokuroria kanë nisur hetimet për të dokumentuar të gjithë dinamikën e konfliktit, ndërsa pritet që në orët në vijim të ketë më shumë informacion zyrtar lidhur me akuzat që do të ngrihen ndaj të arrestuarve dhe ecurinë e procedurave ligjore.
