Dy tërmete të fuqishme që goditën Venezuelën javën e kaluar kanë shkaktuar një katastrofë humanitare me përmasa të mëdha. Bilanci i viktimave është rritur në të paktën 1,450 të vdekur, ndërsa 3,150 persona kanë mbetur të plagosur, sipas një deklarate të bërë të dielën nga Presidenti i Asamblesë Kombëtare, Jorge Rodríguez.
Në një fjalim televiziv, Rodríguez tha se ekipet e emergjencës vijojnë operacionet e kërkim-shpëtimit, duke theksuar se orët në vijim janë vendimtare për të gjetur të mbijetuar nën rrënoja.
“Jemi në orë kritike, në orë vendimtare, për të vazhduar të shpëtojmë jetë”, u shpreh ai.
Sipas autoriteteve, 12,721 persona janë zhvendosur nga banesat e tyre, ndërsa 774 ndërtesa janë dëmtuar rëndë ose janë shembur, mes tyre edhe disa spitale.
Rodríguez falënderoi komunitetin ndërkombëtar për mbështetjen e ofruar në operacionet e emergjencës, duke bërë të ditur se në terren janë angazhuar 2,624 punonjës shpëtimi dhe 137 qen të trajnuar për kërkim.
Ndërkohë, UNICEF ka paralajmëruar se rreth 680 mijë fëmijë kanë nevojë urgjente për ndihmë humanitare pas katastrofës. Organizata thekson se dëmtimet e rënda në spitalet e Karakasit dhe në shtetet La Guaira, Carabobo, Aragua dhe Falcón kanë vështirësuar ndjeshëm ofrimin e shërbimeve shëndetësore, veçanërisht për gratë shtatzëna dhe fëmijët.
“Tre ditë pas fillimit të reagimit, shkalla e nevojës po bëhet gjithnjë e më e qartë”, deklaroi përfaqësuesi i UNICEF-it në Venezuelë, Manuel Rodríguez Pumarol.
