Ndeshja mes Kanadasë dhe Katarit në Kupën e Botës 2026 është shoqëruar me një moment të rëndë që ka tronditur futbollistët dhe tifozët në stadium. Pavarësisht dominimit absolut të Kanadasë, e cila kryesonte me rezultatin e thellë 4-0 pas një ore lojë, vëmendja u zhvendos te dëmtimi i rëndë i mesfushorit Ismael Kone.
Incidenti ndodhi pas një dueli të ashpër me futbollistin e Katarit, Madibo, i cili ndërhyri në mënyrë të rrezikshme ndaj lojtarit kanadez. Gjyqtari reagoi menjëherë duke e ndëshkuar me karton të kuq, ndërsa pamjet e dëmtimit shkaktuan tronditje në fushë.
Sipas raportimeve, Kone ka pësuar thyerje të një kocke në këmbë. Situata ishte aq e rëndë sa regjisorët e transmetimit vendosën të mos fokusonin kamerat te futbollisti gjatë momentit kur stafi mjekësor po i jepte ndihmën e parë.
Lojtarët e të dy skuadrave reaguan me shqetësim dhe mosbesim, ndërsa atmosfera festive në stadium u zbeh menjëherë. Pas disa minutash trajtimi në fushë, Kone u largua me barelë, por para se të dilte nga fusha përshëndeti tifozët me dorë, duke marrë duartrokitje të gjata dhe mbështetje nga tribunat.
Në vend të tij u aktivizua Saliba, ndërsa Kanadaja vijoi kontrollin e ndeshjes. Katari mbeti me nëntë lojtarë në fushë dhe u gjend përballë një misioni të pamundur për të shmangur humbjen e thellë.
Dëmtimi i Kones pritet të jetë një goditje e rëndë për Kanadanë në vijim të Botërorit, ndërsa stafi mjekësor do të kryejë ekzaminime të detajuara për të përcaktuar shkallën e plotë të dëmtimit dhe kohën e rikuperimit.
