Protesta qytetare kundër qeverisë vijoi edhe këtë të hënë në kryeqytet, duke shënuar ditën e 16-të radhazi të mobilizimit masiv. Mijëra qytetarë u mblodhën në qendër të Tiranës për të shprehur pakënaqësinë ndaj qeverisjes dhe për të kërkuar ndryshime politike, ndërsa tubimet po marrin përmasa gjithnjë e më të mëdha.
Nën thirrjet “Rama ik”, “Dorëheqje” dhe “Ju erdhi fundi”, protestuesit marshuan përgjatë bulevardit “Dëshmorët e Kombit”, duke mbajtur pankarta dhe mesazhe kundër qeverisë. Atmosfera u karakterizua nga pjesëmarrje e lartë dhe tension politik, megjithëse manifestimi u zhvillua pa incidente të raportuara nga autoritetet.
Një nga sloganet që dominoi protestën ishte thirrja “Rama në burg, Berisha në burg”, e cila u përsërit vazhdimisht nga grupe të ndryshme pjesëmarrësish dhe u kthye në një nga mesazhet më të spikatura të tubimit.
Në podiumin e protestës morën fjalën aktivistë, përfaqësues të shoqërisë civile dhe qytetarë të ardhur nga diaspora shqiptare. Ata ngritën shqetësime për korrupsionin, emigracionin masiv të të rinjve, mungesën e perspektivës ekonomike dhe krizën e besimit ndaj klasës politike.
Protestuesit kërkuan më shumë transparencë, llogaridhënie nga institucionet dhe një model të ri qeverisjeje që, sipas tyre, t’u përgjigjet interesave të qytetarëve.
Një moment simbolik i protestës ishte interpretimi i këngës “Rama jep dorëheqjen”, e cila tashmë është kthyer në himnin jozyrtar të lëvizjes qytetare dhe shoqëron pothuajse çdo tubim të organizuar në Tiranë.
Gjatë fjalës së tij, aktivisti Arben Kola u bëri thirrje protestuesve të shmangin provokimet dhe përplasjet, duke iu referuar zhvillimeve të një nate më parë, kur një grup manifestuesish u drejtua drejt aeroportit të Rinasit. Ai theksoi se organizatorët kanë përcaktuar një itinerar të qartë proteste brenda territorit të Tiranës dhe kërkoi respektimin e tij.
Ashtu si në ditët e kaluara, protesta nisi para godinës së Kryeministrisë dhe më pas vijoi me marshim në rrugët kryesore të kryeqytetit. Organizatorët kanë bërë të ditur se tubimet do të vazhdojnë edhe në ditët në vijim, duke paralajmëruar se presioni qytetar ndaj qeverisë nuk do të ndalet.
