Vendimi i deputetes Marjana Koçeku për t’u larguar nga grupi parlamentar i Partisë Socialiste dhe për të vijuar mandatin si deputete e pavarur ka shkaktuar reagime të forta brenda radhëve socialiste dhe në opinionin publik.
E njohur gjerësisht si “Neomalësorja”, Koçeku njoftoi publikisht se nuk do të jetë më pjesë e grupit parlamentar të mazhorancës, duke deklaruar se do të vazhdojë aktivitetin e saj politik si deputete e pavarur.
“Prej sot jam deputete e pavarur. Idealet dhe vlerat e mia janë ato që kam pasur dhe i kam shprehur shumë kohë para se të lidhesha me një parti politike. Janë pikërisht ato që më përcaktojnë kufijtë”, shkroi ajo në reagimin e saj.
Largimi i 25-vjeçares vjen vetëm pak muaj pasi ajo siguroi mandatin e deputetes si pjesë e listës së mbyllur të Partisë Socialiste në qarkun e Shkodrës, ku ishte renditur në krye të listës dhe kishte të garantuar zgjedhjen në Kuvend.
Vendimi ka hapur menjëherë debat mbi legjitimitetin moral të mbajtjes së mandatit. Një pjesë e konsiderueshme e socialistëve, aktivistëve dhe mbështetësve të PS-së kërkojnë që Koçeku të dorëzojë mandatin, me argumentin se ai është fituar falë votës për Partinë Socialiste dhe jo si një kandidaturë e pavarur.
Në mbledhjen e grupit parlamentar socialist, sipas burimeve, drejtuesi i grupit Taulant Balla ka deklaruar se nuk ishte vënë në dijeni paraprakisht për vendimin e deputetes dhe se përpjekjet për ta kontaktuar atë nuk kishin dhënë rezultat. Për këtë arsye, ai ka kërkuar që të shmangen komentet publike deri në sqarimin e plotë të situatës.
Ndërkohë, reagimet më të ashpra kanë ardhur nga vetë baza socialiste. Studentja Helena Kaçe, e cila është konsideruar një nga figurat e reja të promovuara nga Partia Socialiste, argumentoi se pavarësia politike nuk mund të ndahet nga mandati i fituar falë një force politike.
Sipas saj, nëse Koçeku nuk identifikohet më me Partinë Socialiste, atëherë akti më i drejtë dhe më parimor do të ishte dorëzimi i mandatit të deputetes.
Në të njëjtën linjë është shprehur edhe anëtari socialist i Këshillit Bashkiak të Tiranës, Alfred Muharremi, i cili theksoi se mandati nuk është pronë personale e deputetit, por një besim i marrë nga votuesit dhe nga forca politike që e ka kandiduar.
Ai nënvizoi se nëse një deputet zgjedh të largohet nga partia që e ka çuar në Kuvend, duhet të heqë dorë edhe nga mandati, duke i lënë vendin përfaqësuesit të radhës në listë.
Largimi i Koçekut ka marrë vëmendje të veçantë edhe për shkak të momentit politik në të cilin ndodh. Vendimi i saj u publikua në kulmin e protestave kundër qeverisë, duke u interpretuar nga shumë analistë si një zhvillim me ndikim politik për mazhorancën.
Deri tani, vetë deputetja nuk ka dhënë shpjegime të detajuara mbi arsyet konkrete që e çuan në këtë vendim, ndërsa debati kryesor mbetet nëse ajo do ta mbajë mandatin si deputete e pavarur apo do të zgjedhë ta dorëzojë atë.
