Në futboll, historitë më të bukura shpesh lindin aty ku askush nuk i pret. Një prej tyre mban emrin e Josimar Dias, i njohur nga të gjithë si Vozinha, portieri veteran i Kombëtares së Kepit të Gjelbër, i cili u shndërrua në heroin e mbrëmjes pas paraqitjes spektakolare ndaj Spanjës në Kupën e Botës.
Në moshën 40-vjeçare, kur shumë futbollistë prej kohësh kanë varur këpucët në gozhdë, Vozinha po jeton momentin më të madh të karrierës së tij. Gardiani i portës së Kepit të Gjelbër arriti të ndalë sulmet e një prej skuadrave favorite të turneut, duke fituar vlerësimin si lojtari më i mirë i ndeshjes dhe admirimin e tifozëve në mbarë botën.
Ironikisht, para nisjes së Botërorit, portieri nuk kishte skuadër. Pas largimit nga klubi portugez GD Chaves, ai mbeti pa ekip dhe me një të ardhme të paqartë. Megjithatë, kjo nuk e pengoi të shkruante një nga historitë më emocionuese të këtij edicioni të Kupës së Botës.
Me një gjatësi prej 1.89 metrash dhe një përvojë të pasur ndërkombëtare, Vozinha ka ndërtuar karrierën e tij larg skenave më të mëdha të futbollit evropian. Ai ka luajtur në klube të ndryshme në Kepin e Gjelbër, Angola, Moldavi, Portugali, Qipro dhe Sllovaki, duke mbrojtur ngjyrat e skuadrave si Batuque, Mindelense, Progresso, Zimbru Kishinau, Gil Vicente, AEL Limassol, AS Trençin dhe GD Chaves.
Megjithatë, asnjë nga këto aventura nuk mund të krahasohet me atë që përjetoi ndaj Spanjës. Portieri veteran realizoi shtatë pritje vendimtare, fitoi duele ajrore dhe u shfaq si muri i pakalueshëm për sulmuesit spanjollë, duke mbajtur në lojë skuadrën e tij gjatë gjithë ndeshjes.
Që prej debutimit me kombëtaren më 8 shtator 2012, Vozinha ka zhvilluar 89 ndeshje me Kepin e Gjelbër dhe konsiderohet një nga figurat më të rëndësishme në historinë e futbollit të këtij vendi.
Paraqitja e tij në stadiumin e Atlantës, me ndërhyrjet spektakolare dhe refleksin e jashtëzakonshëm, pritet të mbetet një nga momentet më të paharrueshme të këtij Botërori. Për një portier që sot vlerësohet vetëm 50 mijë euro në treg, kjo ishte mbrëmja që e vendosi në qendër të vëmendjes së futbollit botëror.
