Shtetet e Bashkuara kanë dërguar një sinjal të qartë për klimën e investimeve në Shqipëri, duke theksuar se interesimi i kompanive amerikane për tregun shqiptar është në rritje, por suksesi i investimeve varet nga garantimi i transparencës, sigurisë juridike dhe konkurrencës së ndershme.
Gjatë një aktiviteti të organizuar nga Dhoma Amerikane e Tregtisë, e ngarkuara me punë e SHBA-së në Tiranë deklaroi se një numër kompanish amerikane janë tashmë të pranishme në sektorë të rëndësishëm të ekonomisë shqiptare, ndërsa shumë të tjera po shqyrtojnë mundësinë për të investuar në vend.
Diplomatja amerikane vlerësoi kuadrin e ri ligjor për shqyrtimin e investimeve të huaja direkte, duke e konsideruar atë një instrument të rëndësishëm për mbrojtjen e interesave kombëtare dhe forcimin e sigurisë ekonomike të Shqipërisë.
Sipas saj, investitorët ndërkombëtarë kërkojnë mbi të gjitha qartësi në rregulla, garanci për trajtim të barabartë dhe mbrojtje të sektorëve strategjikë nga aktorë që nuk respektojnë standardet e tregut të lirë.
“Kompanitë amerikane janë aktive në Shqipëri në fusha si energjia, ndërtimi dhe teknologjia, ndërsa shumë të tjera po ndjekin me interes zhvillimet në vend. Por investitorët kanë nevojë të dinë se rregullat janë të qarta, konkurrenca është e ndershme dhe se sektorët strategjikë mbrohen nga ndikime që nuk veprojnë sipas të njëjtave standarde”, u shpreh ajo.
Diplomatja theksoi se mekanizmi i ri për kontrollin e investimeve nuk duhet të shihet si pengesë burokratike për biznesin, por si një garanci për stabilitet afatgjatë dhe për krijimin e një mjedisi më të sigurt për investitorët seriozë.
Ajo nënvizoi se miratimi i ligjit është vetëm hapi i parë, ndërsa sfida e vërtetë mbetet zbatimi korrekt dhe efektiv i tij. Në këtë drejtim, SHBA-ja do të vazhdojë të mbështesë institucionet shqiptare për forcimin e kuadrit ligjor dhe institucional që lidhet me investimet e huaja.
Mesazhi i përcjellë nga përfaqësuesja amerikane ishte se Shqipëria ka potencial të tërheqë më shumë kapital të huaj, por kjo mund të realizohet vetëm përmes garantimit të transparencës, sigurisë ligjore dhe rregullave të njëjta për të gjithë aktorët ekonomikë.
