Atletja etiopiane Gudaf Tsegay, një prej figurave më të spikatura të atletikës botërore, është pezulluar për katër muaj pas një shkeljeje të rregullave antidoping.
Dy herë kampionia e botës dhe fituesja e medaljes olimpike pranoi praninë e një substance të ndaluar në një test të kryer jashtë garave. Analizat zbuluan një metabolit të letrozolit, substancë që figuron në listën e ndaluar të Agjencisë Botërore Antidoping (WADA).
Tsegay sqaroi se medikamenti i ishte përshkruar nga mjekët për trajtimin e një problemi shëndetësor dhe dorëzoi dokumentacionin përkatës për ta mbështetur këtë pretendim. Në muajin shkurt, ajo aplikoi për një Përjashtim për Përdorim Terapeutik (TUE), ndërsa “World Athletics” vlerësoi se trajtimi i saj përmbushte kriteret e nevojshme.
Megjithatë, WADA nuk pranoi të japë një përjashtim retroaktiv, çka solli një marrëveshje mes sportistes, WADA-s dhe Njësisë së Integritetit të Atletikës (AIU). Sipas AIU-së, pezullimi prej katër muajsh u konsiderua një masë e drejtë, pasi u konstatua se atletja nuk kishte përgjegjësi të konsiderueshme apo kishte vepruar me neglizhencë të rëndë.
Gudaf Tsegay numëron një karrierë të pasur me suksese, mes tyre medaljen e bronztë olimpike në garën e 5.000 metrave, si dhe titujt kampione bote në disiplinat 5.000 dhe 10.000 metra.
