Një operacion i gjerë policor dhe hetimor është zhvilluar mbrëmjen e sotme në Sarandë dhe Ksamil, pas urdhër-arresteve të lëshuara nga Prokuroria e Sarandës në lidhje me dyshimet për favorizim të ndërtimeve pa leje në zonat bregdetare.
Sipas burimeve pranë hetimit, masat e sigurisë janë lëshuar ndaj dhjetëra personave, mes tyre efektivë policie, zyrtarë të pushtetit vendor dhe biznesmenë, të cilët dyshohet se kanë qenë të përfshirë në lejimin apo mbështetjen e ndërtimeve të paligjshme në vijën bregdetare.
Operacioni po zhvillohet nga strukturat e Drejtoria Vendore e Policisë Vlorë në bashkëpunim me Komisariati i Policisë Sarandë, ndërsa kontrollet janë përqendruar në disa zona të njohura turistike të Sarandës dhe Ksamilit.
Burime jozyrtare bëjnë me dije se deri tani janë ekzekutuar të paktën dy urdhër-arreste, një ndaj një punonjësi policie dhe një tjetër ndaj një biznesmeni lokal, ndërsa autoritetet nuk kanë publikuar ende identitetet e tyre.
Hetimet paraprake dyshohet se lidhen me raste të mosveprimit institucional, favorizimit të ndërtimeve pa leje dhe shkeljeve të ligjit në territorin bregdetar, një nga zonat më të ndjeshme dhe më të frekuentuara turistike në jug të vendit.
Ndërkohë, aksioni vijon ende, ndërsa grupet hetimore po kryejnë kontrolle, verifikime dhe procedura për lokalizimin e personave të tjerë të shpallur në kërkim.
Prokuroria e Sarandës pritet të dalë me një deklaratë zyrtare lidhur me operacionin dhe akuzat konkrete që rëndojnë mbi personat e përfshirë në këtë çështje.
