Një aksident i rëndë rrugor është regjistruar pasditen e kësaj të shtune në aksin kombëtar Elbasan–Përrenjas, ku dy automjete janë përplasur me forcë me njëra-tjetrën, duke shkaktuar plagosjen e dy vajzave të reja.
Sipas informacioneve paraprake, të rejat udhëtonin në njërin prej mjeteve të përfshira në aksident dhe, për shkak të dëmtimeve të marra, janë transportuar me urgjencë drejt spitalit për ndihmë mjekësore të specializuar. Deri më tani nuk janë bërë të ditura detaje mbi gjendjen e tyre shëndetësore.
Përplasja e fortë ka shkaktuar panik te drejtuesit e automjeteve që ndodheshin në zonë, ndërsa lëvizja në këtë segment rrugor është paralizuar për rreth 40 minuta, duke krijuar radhë të gjata automjetesh në të dy krahët e rrugës.
Menjëherë pas sinjalizimit, në vendngjarje mbërritën patrullat e policisë, ambulancat dhe grupi hetimor, të cilët nisën punën për normalizimin e trafikut dhe zbardhjen e plotë të shkaqeve të aksidentit.
Autoritetet po hetojnë për të përcaktuar dinamikën e përplasjes dhe për të verifikuar nëse aksidenti është shkaktuar nga shpejtësia, parakalimet e rrezikshme apo faktorë të tjerë rrugorë.
