Shërbimet amerikane të inteligjencës vlerësojnë se Mojtaba Khamenei po luan një rol kyç në drejtimin e strategjisë ushtarake të Iranit dhe në negociatat e ndjeshme me Shtetet e Bashkuara të Amerikës për përfundimin e konfliktit.
Sipas raportimeve të inteligjencës amerikane, djali i ish-liderit suprem Ali Khamenei po bashkëpunon ngushtë me drejtuesit më të lartë politikë dhe ushtarakë të regjimit iranian për menaxhimin e situatës së luftës dhe koordinimin e kontakteve diplomatike me Uashingtonin.
Megjithatë, mungesa e tij e gjatë në publik ka shtuar spekulimet mbi gjendjen shëndetësore dhe ndikimin real në hierarkinë e pushtetit iranian. Mojtaba Khamenei nuk është shfaqur publikisht që prej sulmit të rëndë në ditët e para të luftës, ku mbeti i plagosur dhe ku u eliminuan disa prej komandantëve më të rëndësishëm ushtarakë iranianë.
Burime pranë CIA theksojnë se struktura e pushtetit në Teheran mbetet ende e paqartë, por Mojtaba konsiderohet një nga figurat më me ndikim në procesin e vendimmarrjes, sidomos në lidhje me negociatat për armëpushim dhe raportet me SHBA-në.
Nga ana tjetër, administrata e Donald Trump vazhdon të insistojë për një zgjidhje diplomatike të konfliktit, edhe pse tensionet mes Uashingtonit dhe Teheranit mbeten në nivele shumë të larta.
Raporti i inteligjencës amerikane vlerëson gjithashtu se Irani ruan ende kapacitete të konsiderueshme ushtarake dhe mundësi për t’i rezistuar për një kohë të gjatë presionit dhe bllokadës amerikane.
Sipas burimeve të sigurisë, Mojtaba Khamenei përdor masa ekstreme sigurie për të shmangur gjurmimin nga shërbimet amerikane. Ai raportohet se shmang pajisjet elektronike dhe komunikon kryesisht përmes takimeve direkte ose korrierëve të besuar, duke e bërë shumë të vështirë lokalizimin e tij nga inteligjenca perëndimore.
