Presidenti amerikan Donald Trump ka njoftuar se nga dita e shtunë do të hyjë në fuqi një armëpushim treditor mes Rusia dhe Ukraina, në atë që po konsiderohet si një zhvillim i rëndësishëm diplomatik pas muajsh tensionesh dhe përplasjesh të përgjakshme.
Sipas deklaratës së Trump, armëpushimi do të nisë më 9 maj, në ditën kur në Moskë zhvillohen ceremonitë për Ditën e Fitores, dhe do të zgjasë deri më 11 maj. Presidenti amerikan bëri të ditur se ka zhvilluar bisedime direkte si me presidentin rus Vladimir Putin, ashtu edhe me presidentin ukrainas Volodymyr Zelensky, duke kërkuar respektimin e plotë të marrëveshjes.
Trump e publikoi lajmin përmes platformës së tij Truth Social, ku deklaroi se palët kanë rënë dakord edhe për një shkëmbim masiv të të burgosurve, me nga 1 mijë persona për secilën palë.
“Kërkesa u bë drejtpërdrejt nga unë dhe e vlerësoj shumë dakordësinë e Presidentit Putin dhe Presidentit Zelensky. Shpresoj që ky të jetë fillimi i fundit të një lufte të gjatë, brutale dhe vdekjeprurëse”, shkroi Trump.
Armëpushimi vjen pas iniciativës së shpallur disa ditë më parë nga Kremlini, i cili kishte propozuar ndalimin e përkohshëm të luftimeve gjatë festimeve të Ditës së Fitores në Luftën e Dytë Botërore. Megjithatë, njoftimi i fundit i Trump konfirmon se marrëveshja është zgjeruar edhe për dy ditë të tjera, duke rritur shpresat për ulje të tensioneve në front.
Lajmi ka ngjallur reagime të shumta në arenën ndërkombëtare, ndërsa vëmendja tani është përqendruar te mënyra se si do të zbatohet armëpushimi në terren dhe nëse ky hap mund të shërbejë si nisje për negociata më të gjera paqeje mes Moskës dhe Kievit.
