Autoritetet kineze kanë dhënë një nga vendimet më të ashpra të viteve të fundit ndaj zyrtarëve të lartë ushtarakë, duke dënuar me vdekje dy ish-ministrat e Mbrojtjes, Wei Fenghe dhe Li Shangfu, nën akuzat për korrupsion.
Sipas mediave shtetërore kineze, të cituara nga Reuters, gjykata ka vendosur dënimin me vdekje me pezullim, çka nënkupton se dënimi mund të konvertohet në burgim të përjetshëm nëse gjatë periudhës së pezullimit ata nuk kryejnë shkelje të tjera.
Të dy ish-zyrtarët u përjashtuan nga Partia Komuniste e Kinës gjatë vitit 2024, pasi u akuzuan për “shkelje të rënda të disiplinës”, term që përdoret zakonisht nga autoritetet kineze për çështje korrupsioni dhe abuzimi me pushtetin.
Ky rast konsiderohet si një prej goditjeve më të forta ndaj elitës ushtarake kineze në kuadër të fushatës së gjerë antikorrupsion të ndërmarrë nga presidenti Xi Jinping, e cila prej vitesh ka prekur dhjetëra figura të rëndësishme politike dhe ushtarake në vend.
