Vendimi i SHBA për të tërhequr rreth 5 mijë trupa nga Gjermania ka sjellë reagimin e parë nga NATO, duke ngritur pikëpyetje mbi balancën e sigurisë në kontinentin europian.
Zëdhënësja e NATO-s, Allison Hart, deklaroi se aleanca është duke analizuar me kujdes ndikimin e këtij vendimi në pozicionimin e forcave ushtarake në Europë.
“Po punojmë me SHBA për të kuptuar detajet e vendimit të tyre mbi praninë ushtarake në Gjermani. Ky zhvillim nënvizon nevojën që Europa të vazhdojë të investojë më shumë në mbrojtje dhe të marrë një pjesë më të madhe të përgjegjësisë për sigurinë e përbashkët”, u shpreh ajo.
Sipas saj, ky hap vjen në një moment kur vendet anëtare të NATO-s kanë rritur angazhimet për shpenzimet në mbrojtje, duke synuar përmbushjen e objektivave në raport me Prodhimin e Brendshëm Bruto.
Megjithatë, Hart theksoi se aleanca mbetet e sigurt në kapacitetet e saj për të garantuar parandalimin dhe mbrojtjen kolektive, edhe në kushtet e ndryshimeve në praninë ushtarake amerikane.
“Ne mbetemi të bindur në kapacitetin tonë për të siguruar mbrojtjen dhe parandalimin, ndërsa vazhdon ky tranzicion drejt një Evrope më të fortë brenda një NATO-je më të fortë”, shtoi ajo.
Ky zhvillim pritet të hapë diskutime më të gjera mbi rolin e Europës në sigurinë e saj dhe marrëdhëniet transatlantike, në një kohë kur dinamika gjeopolitike mbetet e tensionuar.
