Një operacion i befasishëm i Policia e Shtetit ka goditur një rrjet të dyshuar të këmbimit valutor pa licencë, duke çuar në arrestimin e tre personave në aksin Fier–Lushnjë.
Sipas policisë, operacioni i koduar “Transaksioni” u finalizua me vënien në pranga të shtetasve Ramazan Koçiu, Edmond Shkurti dhe Abaz Idrizi, të cilët dyshohet se ushtronin aktivitetin e kambizmit në mënyrë të paligjshme.
Gjatë kontrolleve fizike dhe në banesat e tyre, autoritetet sekuestruan shuma të konsiderueshme parash në valuta të ndryshme: rreth 4.2 milionë lekë, 17 300 euro, 1 400 paund, 300 dollarë, 200 franga dhe 2 500 korona, si dhe 5 telefona celularë.
Sipas hetimeve paraprake, aktiviteti i tyre zhvillohej pa licencën përkatëse nga organet kompetente, ndërsa paratë e sekuestruara janë marrë si prova materiale për vijimin e procedurave ligjore.
Operacioni vjen në kuadër të goditjes së aktiviteteve informale financiare dhe rritjes së kontrollit ndaj këmbimit valutor në vend.
