Tensione të forta dhe përplasje të ashpra janë regjistruar këtë të enjte në Kuvendin e Shqipërisë, ku seanca plenare është ndërprerë për disa minuta pas një incidenti të papritur që përfshiu deputetin demokrat Luçiano Boçi.
Gjithçka nisi kur Boçi mori fjalën dhe më pas refuzoi të lirojë foltoren, duke bllokuar vijimin normal të seancës. Veprimi i tij solli reagimin e menjëhershëm të drejtuesit të seancës, kryeparlamentarit Niko Peleshi, i cili i kërkoi disa herë të respektonte rregulloren dhe të ulej në vendin e tij.
Debati mes palëve u përshkallëzua me tone të ashpra. Peleshi theksoi se deputeti kishte shfrytëzuar kohën e tij për të folur dhe nuk kishte kërkuar replikë sipas procedurës, duke e akuzuar për shkelje të rregullores së Kuvendit. Nga ana tjetër, Boçi reagoi duke kundërshtuar dhe duke akuzuar për paragjykim.
“Ju lutem, uluni dhe mos ofendoni. Ju tërheq vëmendjen”, deklaroi Peleshi, duke paralajmëruar masa disiplinore. Por situata nuk u qetësua. Kryetari i seancës vijoi me vërejtje të dytë, ndërsa paralajmëroi edhe heqjen e të drejtës së fjalës në rast të vijimit të shkeljeve.
Pavarësisht thirrjeve të përsëritura, Boçi nuk u tërhoq nga foltorja, duke detyruar drejtuesin e seancës të ndërmarrë hapin ekstrem: përjashtimin e tij nga salla e Kuvendit. Menjëherë pas këtij vendimi, seanca u ndërpre për 5 minuta për të rikthyer normalitetin.
Ngjarja ka rikthyer edhe një herë vëmendjen tek tensionet politike dhe përplasjet e shpeshta në sallën e Kuvendit, duke ngritur pikëpyetje mbi klimën e debatit parlamentar dhe respektimin e rregullave institucionale.
