Autoritetet e sigurisë në Emiratet e Bashkuara Arabe kanë njoftuar goditjen e një organizate të dyshuar si terroriste, e cila sipas tyre kishte lidhje me Iranin dhe po përgatitej të kryente sulme në rajonin e Lindjes së Mesme.
Sipas njoftimit zyrtar, shërbimet e sigurisë kanë arrestuar 27 persona të dyshuar si anëtarë të këtij rrjeti, të cilët akuzohen për planifikim të “akteve terroriste dhe sabotazhi brenda territorit kombëtar”.
Autoritetet deklarojnë se hetimet paraprake kanë zbuluar lidhje të drejtpërdrejta të organizatës me struktura të Iranit, ndërsa operacioni është përshkruar si një ndër më të rëndësishmit e kohëve të fundit në fushën e sigurisë së brendshme.
Në deklaratat publike, autoritetet e Emirateve të Bashkuara Arabe theksuan se vendi mbetet i vendosur të përballet me çdo kërcënim ndaj sigurisë kombëtare, duke e cilësuar shtetin si një “fortesë të pathyeshme” përballë çdo aktiviteti destabilizues.
Arrestimet e fundit vijnë në një moment tensionesh të vazhdueshme në rajon, ku vendet e Gjirit kanë rritur masat e sigurisë ndaj grupeve të dyshuara si të lidhura me struktura militante dhe organizata të ndryshme në Lindjen e Mesme.
