Pas dështimit të takimit me kreun e Lidhjes Demokratike të Kosovës, Lumir Abdixhiku, për arritjen e një marrëveshjeje mbi zgjedhjen e presidentit, kryeministri i Kosovës dhe njëherazi kryetar i Lëvizjes Vetëvendosje, Albin Kurti, ka zbuluar detaje nga ofertat që i kishte bërë LDK-së për bashkëqeverisje.
Kurti bëri të ditur se kishte propozuar një paketë të gjerë bashkëpunimi, e cila përfshinte postin e zëvendëskryeministrit, Ministrinë e Punëve të Jashtme si dhe tri ministri të tjera. Sipas tij, posti i zëvendëskryeministrit i ishte ofruar drejtpërdrejt vetë Abdixhikut.
Ai shtoi se një tjetër opsion i diskutuar ishte edhe dhënia e postit të kryetarit të Kuvendit për LDK-në, përmes një riorganizimi institucional.
Megjithatë, sipas Kurtit, të gjitha këto oferta janë refuzuar nga LDK, duke bërë që negociatat të përfundojnë pa rezultat konkret.
Pas këtij zhvillimi, kryeministri konfirmoi se ka ndërmarrë një hap të ri politik, duke kontaktuar kryetarin e Partisë Demokratike të Kosovës, Bedri Hamza, për të shqyrtuar mundësitë e bashkëpunimit.
“Para se të vija këtu i kam dërguar mesazh Bedri Hamzës, për të parë si mund të ecim përpara,” u shpreh Kurti.
Megjithatë, ai theksoi qartë se oferta e bërë për LDK-në nuk do të vlejë për PDK-në, duke e cilësuar atë si një propozim ekskluziv.
“Oferta jonë për bashkëqeverisje me LDK-në ishte specifike dhe nuk vlen për PDK-në. Duhet kuptuar konteksti dhe situata në të cilën ndodhemi,” deklaroi ai.
Këto zhvillime vijnë në një moment vendimtar për Kosovën, ndërsa afati kushtetues për zgjedhjen e presidentit po afrohet dhe presioni për një marrëveshje politike mes partive kryesore po rritet çdo ditë.
