Ministri i Jashtëm i Turqisë, Hakan Fidan, ka zbuluar detaje mbi zhvillimin e bisedimeve intensive mes Shteteve të Bashkuara të Amerikës dhe Iranit, duke theksuar se procesi ndodhet në një fazë vendimtare.
Sipas tij, negociatat kanë hyrë në një pikë kritike ku po testohet serioziteti dhe sinqeriteti i të dyja palëve. Ai nënvizoi se ekziston vullnet për të vijuar dialogun, ndërsa armëpushimi aktual ka sjellë lehtësim jo vetëm për palët, por edhe për komunitetin ndërkombëtar.
Megjithatë, sfidat mbeten. Hakan Fidan paralajmëroi se afati dyjavor i armëpushimit nuk është i mjaftueshëm për të zgjidhur të gjitha çështjet e hapura, duke lënë të kuptohet se një shtyrje e re është e pashmangshme.
Ai shtoi se, ndonëse negociatat janë afër përfundimit, disa dallime të rëndësishme vazhdojnë të mbeten, veçanërisht në një ose dy pika kyçe që kërkojnë zgjidhje.
Turqia po luan një rol të rëndësishëm si ndërmjetëse në këtë proces, ndërsa ekspertët ndërkombëtarë mbeten të rezervuar për arritjen e shpejtë të një marrëveshjeje përfundimtare mes SHBA-së dhe Iranit.
