Ish-presidentja e Kosovës, Vjosa Osmani, ka deklaruar se Shtetet e Bashkuara të Amerikës vijojnë të mbështesin fuqishëm Kosovën, pas një takimi me Këshilltarin Special të Presidentit amerikan, Massad Boulos.
Në një njoftim publik, Osmani bëri të ditur se gjatë takimit ka shprehur mirënjohjen e saj për, siç u shpreh ajo, “mbështetjen e palëkundur të administratës amerikane ndaj Kosovës”, duke theksuar rëndësinë e bashkëpunimit strategjik mes dy vendeve.
Sipas Osmanit, Shtetet e Bashkuara jo vetëm që mbështesin Kosovën në aspektin politik dhe diplomatik, por janë gjithashtu të përfshira në nisma që synojnë forcimin e paqes dhe stabilitetit në rajon.
Ajo ka theksuar se ka falënderuar përfaqësuesin amerikan për ftesën që Kosova të bëhet pjesë e një nisme ndërkombëtare të quajtur “Bordi i Paqes”, ku vendi do të kishte rol themelues.
“Falënderova Këshilltarin Special të Presidentit Trump për mbështetjen e vazhdueshme ndaj Kosovës, përfshirë edhe ftesën që Kosova të jetë anëtare themeluese e Bordit të Paqes,” u shpreh Osmani.
Ish-presidentja theksoi gjithashtu pritshmërinë e saj që kjo mbështetje të vazhdojë edhe në të ardhmen, në funksion të forcimit të paqes dhe zhvillimit ekonomik në Kosovë dhe rajon.
Ajo shtoi se bashkëpunimi me Shtetet e Bashkuara mbetet një nga prioritetet kryesore të politikës së jashtme të Kosovës.
“Shpresoj që kjo mbështetje për popullin e Kosovës të vazhdojë, ndërsa punojmë së bashku për paqe dhe prosperitet në rajonin tonë dhe më gjerë,” deklaroi ajo.
Osmani ritheksoi gjithashtu orientimin e qartë të Kosovës drejt Shteteve të Bashkuara, duke e cilësuar vendin si një nga aleatët më të fortë dhe më pro-amerikanë në botë.
Takimi vjen në një periudhë kur bashkëpunimi ndërmjet Kosovës dhe SHBA-së mbetet një nga shtyllat kryesore të politikës së jashtme dhe sigurisë së vendit.
