Një raport i bujshëm nga media portugeze Record ka ndezur spekulimet në Spanjë, duke pretenduar se Zhoze Murinjo është sërish në radarin e Real Madridit për postin e trajnerit.
Sipas këtij raportimi, drejtuesit e klubit madrilen, përfshirë presidentin Florentino Pérez, po e shohin trajnerin portugez si një nga opsionet serioze për të ardhmen e pankinës, në një moment kur klubi po kalon një periudhë pa trofe dhe me rezultate nën pritshmëri.
Murinjo shihet si një alternativë e mundshme pas periudhës së trajnerit Arbeloa, i cili nuk ka arritur të bindë pas largimit të mëparshëm të Xabi Alonsos. Megjithatë, rikthimi i tij në “Santiago Bernabéu” do të ishte i papritur, duke marrë parasysh largimin e tensionuar në vitin 2013.
Një histori e mëparshme në Madrid
Zhoze Murinjo ka drejtuar Real Madridin në 178 ndeshje, ku ka regjistruar 23 humbje dhe 28 barazime gjatë periudhës së tij në krye të ekipit. Pavarësisht ndarjes jo të lehtë, ai mbetet një figurë e njohur për tifozët dhe për historinë e klubit.
Aktualisht, trajneri portugez drejton Benfikën, që ndodhet në garë në kampionatin portugez, por me një diferencë prej disa pikësh nga vendi i parë.
Alternativa të tjera në listë
Përveç Murinjos, në listën e kandidatëve të përfolur për stolin e Real Madridit përmenden edhe emra të tjerë të mëdhenj si Jürgen Klopp dhe Massimiliano Allegri.
Real Madrid, ndërkohë, po mbyll një tjetër sezon pa trofe, gjë që ka shtuar presionin mbi drejtuesit për të marrë një vendim të rëndësishëm për të ardhmen e pankinës.
