Një ngjarje e rëndë dhe e pazakontë është regjistruar gjatë natës në lagjen “Tetë Shkurti” të qytetit të Fierit, ku një burrë ka humbur jetën gjatë një tentative për të hyrë me forcë në një banesë private.
Sipas informacioneve paraprake nga autoritetet, viktima, një shtetas rreth 40 vjeç ende i paidentifikuar, dyshohet se ka tentuar të depërtojë në një banesë trekatëshe përmes një dritareje. Gjatë përpjekjes për të hyrë brenda, ai ka mbetur i bllokuar në hapësirën e ngushtë të dritares, me trupin pjesërisht brenda dhe pjesërisht jashtë objektit, duke humbur jetën në vendngjarje.
Ngjarja është konstatuar nga një person që kujdesej për banesën, i cili ka gjetur trupin e pajetë dhe ka njoftuar menjëherë shërbimet e rendit. Në vendngjarje kanë mbërritur forcat e policisë dhe grupi hetimor, të cilët kanë kryer këqyrjen e parë të rrethanave.
Sipas dëshmive paraprake, banesa trekatëshe i përket familjes Lule, ndërsa kryefamiljari ndodhet prej rreth një muaji jashtë vendit. Familjarët dhe fqinjët janë marrë në pyetje për të ndihmuar në identifikimin e viktimës dhe zbardhjen e plotë të ngjarjes.
Trupi i pajetë është transportuar në morgun e qytetit të Fierit për ekspertizë mjeko-ligjore, ndërsa hetimet vijojnë për të përcaktuar të gjitha rrethanat që çuan në këtë ngjarje tragjike.
