Republika e Irlandës është përfshirë në një valë të gjerë protestash dhe bllokadash që kanë paralizuar qarkullimin në disa zona të vendit, duke detyruar qeverinë të ndërhyjë me masa emergjente për të lehtësuar krizën e karburantit.
Pas rreth një jave protestash të vazhdueshme, koalicioni qeverisës i përbërë nga Partia “Fine Gael” dhe “Fianna Fáil” ka njoftuar një paketë lehtësuese ekonomike për fermerët, shoferët e kamionëve dhe sektorin e transportit rrugor, në përpjekje për të ulur tensionet sociale.
Masat e reja përfshijnë zgjatjen e përjashtimeve nga taksa e karburantit dhe shtyrjen e rritjes së taksës së karbonit, e cila ishte planifikuar të hynte në fuqi më 1 maj, por tani është shtyrë deri në muajin tetor. Po ashtu, është parashikuar një ulje e drejtpërdrejtë prej rreth 0.10 euro për litër për naftën dhe benzinën.
Vendimi pritet të hyjë në fuqi nga mesnata e së martës, pasi të marrë miratimin e parlamentit irlandez.
Kriza e çmimeve të karburantit është përkeqësuar ndjeshëm muajt e fundit, në një periudhë kur tregjet globale të energjisë janë tronditur nga konfliktet ndërkombëtare dhe pasiguritë në furnizim. Çmimi i naftës në vend është rritur ndjeshëm, duke shkaktuar pakënaqësi të madhe te sektorët që varen drejtpërdrejt nga transporti.
Protestat janë organizuar nga grupe të ndryshme, përfshirë shoferë kamionësh, fermerë, taksistë dhe operatorë autobusësh, të cilët kanë bllokuar rrugë kryesore, autostrada dhe pika strategjike furnizimi, përfshirë edhe aksesin në depot e karburantit dhe infrastrukturën energjetike.
Situata mbetet e tensionuar, ndërsa autoritetet irlandeze paralajmërojnë se do të vijojnë negociatat për të shmangur përshkallëzimin e mëtejshëm të krizës.
