Kryetari i Bashkisë së Tiranës, Erion Veliaj, ka depozituar një kërkesë në Gjykatën Kushtetuese, duke kundërshtuar vendimin e GJKKO që e ka kaluar për gjykim dosjen në ngarkim të tij.
Sipas mbrojtjes ligjore të Veliajt, vendimi i datës 9 shkurt 2026 dhe të gjitha veprimet e mëvonshme të bazuara në të duhet të shpallen të pavlefshme, pasi procesi gjyqësor, sipas tyre, ka cenuar rëndë të drejtat themelore dhe standardet kushtetuese.
Në kërkesën e depozituar, pala mbrojtëse kërkon gjithashtu shfuqizimin e disa dispozitave ligjore që pretendohet se kanë ndikuar drejtpërdrejt në zhvillimin e procesit, duke argumentuar se ato kanë krijuar shkelje të të drejtave kushtetuese jo vetëm për Veliajn, por edhe për çdo qytetar në situata të ngjashme.
Avokati mbrojtës, Plarent Ndreca, ka deklaruar se çështja është ngritur për shkak të shkeljeve serioze gjatë procedurave gjyqësore.
Sipas tij, procesi është zhvilluar në mënyrë të tillë që bie ndesh me garancitë themelore të një gjykimi të drejtë, duke e bërë të domosdoshme ndërhyrjen e Gjykatës Kushtetuese.
Çështja pritet të shqyrtohet në ditët në vijim dhe mund të ketë ndikim të rëndësishëm në ecurinë e procesit ndaj kryebashkiakut të Tiranës.
