Kombëtarja e Kosovës ka shkëlqyer në stadiumin “Tehelné Pole”, duke arritur një fitore të jashtëzakonshme 4-3 ndaj Sllovakisë në gjysmëfinalen e “play-off”-it për Botërorin 2026.
Ndeshja nuk nisi mirë për Dardanët, të cilët u ndëshkuan që në minutën e 6-të nga Martin Valjent, i cili shënoi me kokë për vendasit. Por Veldin Hoxha barazoi rezultatin në minutën e 21-të me një supergol nga jashtë zone, duke ndezur atmosferën në stadium dhe shpresën për Kosovën.
Pjesa e parë u mbyll 2-1 për Sllovakinë pas golit të Lukas Haraslin në minutën e 45-të, por pjesa e dytë u shndërrua në një festë të vërtetë kuqezi.
Fisnik Asllani barazoi menjëherë në minutën e 47-të me një goditje të fuqishme me kokë, ndërsa Muslija realizoi golin e dytë për Kosovën në minutën e 60-të, duke marrë avantazhin. Kreshnik Hajrizi vulosi rezultatin 4-2 në minutën e 72-të, duke i dhënë një epërsi të sigurt Dardanëve.
Në minutën e 94-të, Strelec shënoi golin e tretë për Sllovakinë, por ishte tepër vonë për të ndryshuar fatin e ndeshjes.
Me këtë fitore spektakolare 4-3, Kosova bëhet gati për finalen e “play-off”-it, ku do të përballet me Turqinë, e cila eliminoi Rumaninë, duke i dhënë Dardanëve një mundësi të artë për një kualifikim historik në Botërorin 2026.
