Presidenti amerikan Donald Trump ka zhvilluar një bisedë telefonike me kryeministrin indian Narendra Modi, ku në fokus ka qenë përshkallëzimi i situatës në Lindjen e Mesme dhe rëndësia strategjike e Ngushtica e Hormuzit.
Sipas deklaratave zyrtare, dy liderët kanë shkëmbyer pikëpamje mbi zhvillimet e fundit dhe kanë theksuar nevojën për të mbajtur të hapur dhe të sigurt këtë korridor jetik për tregtinë globale të energjisë.
Modi e cilësoi bisedën si një “shkëmbim të dobishëm”, duke nënvizuar se India mbështet uljen e tensioneve dhe rikthimin e paqes sa më shpejt të jetë e mundur. Ai theksoi se garantimi i funksionimit normal të Ngushticës së Hormuzit është thelbësor për stabilitetin ekonomik global.
Biseda vjen në një moment kur konflikti në rajon vijon të përshkallëzohet, pas ofensivës së përbashkët të SHBA-së dhe Izraelit ndaj Iranit, dhe kundërpërgjigjeve të Teheranit me sulme me dronë dhe raketa.
Ndërkohë, bllokimi i pjesshëm i Ngushticës së Hormuzit që prej fillimit të marsit ka ndikuar drejtpërdrejt në tregjet ndërkombëtare, duke rritur kostot e transportit dhe çmimet e naftës.
Në këtë klimë tensioni, Trump ka deklaruar se ka urdhëruar një pauzë pesë-ditore të sulmeve ndaj infrastrukturës energjetike iraniane, duke folur për “bisedime produktive”. Megjithatë, autoritetet iraniane i kanë mohuar këto pretendime, duke thelluar pasigurinë mbi zhvillimet diplomatike në prapaskenë.
