Seanca gjyqësore ndaj kryebashkiakut të Tiranës, Erion Veliaj, është shtyrë këtë të martë, pas një zhvillimi të papritur gjatë procesit në GJKKO.
Shkak për shtyrjen u bë mungesa e përfaqësimit ligjor për një nga të pandehurit në çështje, Meriman Palushi, çka e bëri të pamundur vijimin normal të seancës.
Ndërkohë, gjykata vendosi të legjitimojë si mbrojtës ligjor të Veliajt ish-deputetin Plarent Ndreca, një vendim që erdhi pavarësisht kundërshtimeve të SPAK.
Prokurori i posaçëm Altin Dumani kishte ngritur shqetësime mbi këtë përfaqësim, duke theksuar se Ndreca ishte marrë më herët në pyetje gjatë fazës së hetimit, çka sipas tij mund të krijonte konflikt interesi.
Seanca u shoqërua me debate të forta mes prokurorit Dumani dhe avokatit Ndreca, duke e kthyer sallën e gjyqit në një arenë përplasjesh procedurale.
Me vendimin për shtyrje, pritet që procesi të rifillojë në një datë tjetër, ndërsa çështja ndaj Veliajt vijon të mbetet në fokus të drejtësisë dhe opinionit publik.
