Ish-deputeti i Partisë Demokratike, Ervin Salianji, ka konfirmuar publikisht se do të kandidojë për postin e kryetarit të PD-së në zgjedhjet e 23 majit, duke hyrë kështu në garë përballë liderit aktual, Sali Berisha.
Gjatë një interviste televizive, Salianji u shpreh se vendimi i tij vjen pas një serie takimesh me mbështetës dhe anëtarë të partisë, ku ka dëgjuar nga afër shqetësimet e demokratëve për situatën aktuale të PD-së.
Ai theksoi se, në gjendjen e tanishme, Partia Demokratike nuk ka gjasa të fitojë përballë Partisë Socialiste, duke nënvizuar nevojën për ndryshim dhe riorganizim të brendshëm.
Salianji sqaroi gjithashtu se kandidimi i tij nuk lidhet me konflikte personale, duke theksuar se nuk ka pasur përplasje me Berishën apo figura të tjera, por se fokusi i tij mbetet te forcimi i partisë dhe rikthimi i saj në një alternativë fituese për zgjedhësit.
