Autoritetet izraelite deklarojnë se Irani ka lëshuar më shumë se 400 raketa balistike drejt territorit të Izraelit që nga fillimi i konfliktit, duke theksuar se shumica dërrmuese e tyre janë interceptuar nga sistemet mbrojtëse ajrore.
Sipas ushtrisë izraelite, rreth 92 për qind e raketave janë rrëzuar me sukses, duke kufizuar ndjeshëm dëmet dhe viktimat. Këtë e bëri të ditur zëdhënësi i ushtrisë, Nadav Shoshani, i cili nënvizoi efektivitetin e lartë të mbrojtjes ajrore.
Megjithatë, disa raketa kanë arritur të depërtojnë, duke shkaktuar pasoja në terren. Vetëm një ditë më parë, sulmet goditën dy qyteza në jug të vendit, ku rreth 175 persona mbetën të plagosur.
Një nga zonat e prekura ishte Dimona, pranë së cilës besohet se ndodhet një nga objektet më të ndjeshme strategjike të Izraelit. Sipas raportimeve, raketat ranë rreth pesë kilometra larg këtij objekti, duke rritur shqetësimet për sigurinë në zonë.
Situata mbetet e tensionuar, ndërsa përplasjet mes dy palëve vazhdojnë dhe rreziku i përshkallëzimit mbetet i lartë.
