Një incident i rrezikshëm ka tronditur Nju Jork, pasi policia konfirmoi se një pajisje shpërthyese e improvizuar u gjet pranë rezidencës zyrtare të kryebashkiakut Zoran Mamdaní në Gracie Mansion, në zonën e Manhattan.
Ngjarja ndodhi të shtunën gjatë një proteste anti-muslimane të organizuar pranë rezidencës së kryebashkiakut. Në të njëjtën kohë, në zonë ishte mbledhur edhe një grup më i madh kundërprotestuesish, duke rritur tensionin mes palëve.
Sipas policisë së Nju Jork, dy burra që dyshohet se ishin pjesë e kundërprotestuesve hodhën një pajisje zjarrvënëse pranë forcave të rendit dhe lanë një tjetër pajisje të dyshimtë në zonë. Pajisjet përbëheshin nga kavanoza me fitil të mbushura me copa druri dhe vida, duke ngritur dyshime për një sulm të mundshëm.
Zëdhënësja e policisë, Jessica Tisch, tha se ekspertët e njësisë së shpërthimeve konfirmuan se një nga pajisjet nuk ishte thjesht një mjet tymues apo fals, por një pajisje shpërthyese e improvizuar që mund të kishte shkaktuar plagosje të rënda apo edhe viktima.
Autoritetet kanë nisur hetimet për të identifikuar autorët dhe për të sqaruar rrethanat e plota të incidentit, ndërsa siguria në zonë është shtuar ndjeshëm.
