Një vizitë e biznesmenit të njohur Samir Mane në ambientet e Federata Shqiptare e Futbollit ka tërhequr vëmendjen, ndërsa presidenti i FSHF-së, Armand Duka, i bëri publikisht një ftesë të drejtpërdrejtë për t’u përfshirë në menaxhimin e një klubi futbolli në Shqipëri.
Takimi vjen në një moment kur në vend po diskutohet projektligji për sponsorizimet në sport, i cili pritet të japë një shtysë të re financiare për klubet dhe federatat.
Gjatë bisedës së publikuar, Mane u shpreh me humor se kishte ardhur në federatë për të takuar presidentin, mikun e tij, i cili – sipas tij – po përpiqet ta bindë të investojë më shumë në futboll. Ai shtoi me ironi se ndoshta mund të humbasë para, por edhe mund të fitojë.
Nga ana tjetër, Duka e orientoi diskutimin jo thjesht drejt financimit, por drejt menaxhimit të drejtpërdrejtë të një klubi.
“Ti je shumë i zoti në menaxhim. Nuk është jeta vetëm lekë. Menaxho një klub futbolli, sepse njerëzit e duan futbollin. Ti nuk ke humbur asnjëherë, ndaj besoj se nuk do të humbasësh as këtu”, u shpreh kreu i FSHF-së.
Deklarata u interpretua si një ftesë e hapur për përfshirjen e një prej biznesmenëve më të fuqishëm në vend në futbollin shqiptar. Një hap i tillë, nëse do të konkretizohej, mund të sillte një dimension të ri profesionalizmi dhe investimi në këtë sport.
Megjithatë, nga një sugjerim publik deri te një vendimmarrje konkrete, mbetet për t’u parë nëse Mane do ta marrë në konsideratë këtë sfidë të re.
