Kryetari i Partisë Demokratike, Sali Berisha, akuzoi sot kryeministrin Edi Rama se po ndërton një “Dubai ofshore” në Durrës dhe se projekti i Porto Romanos po i jepet një kontraktori rus. Nga selia e PD-së, Berisha deklaroi se Rama po përdor zëvendëskryeministren Belinda Balluku si “mburojë” për të shmangur përgjegjësinë ligjore për çështje që, sipas tij, lidhen me afera korruptive.
Sipas kreut të opozitës, projekti në Durrës kap vlerën e 4 miliardë eurove dhe, siç u shpreh ai, do të financohet me para të paligjshme. Ai shtoi gjithashtu se do të kërkohet hetim parlamentar për çështjen e ndërtimit të portit të ri në Porto Romano, duke pretenduar përfshirje të kompanive ruse në këtë proces.
Berisha ngriti akuza edhe për çështjen e mesazheve të administruara nga SPAK në dosjen që lidhet me Ballukun, duke pretenduar se një pjesë e konsiderueshme e komunikimeve i përkasin vetë kryeministrit. Ai përmendi gjithashtu si skandal çështjen e AKSHI, duke e akuzuar qeverinë për abuzime me tenderë dhe për keqpërdorim të të dhënave të qytetarëve.
Në deklaratën e tij, Berisha e cilësoi si të papranueshme edhe nismën e qeverisë për ndryshime ligjore që lidhen me pezullimin e zyrtarëve të lartë, duke e akuzuar Ramën për tentativa për të shmangur përgjegjësinë institucionale.
Duke iu referuar edhe aferës së inceneratorëve, lideri i opozitës e quajti atë “një monument korrupsioni”, ndërsa kërkoi dorëheqjen e menjëhershme të kryeministrit, duke paralajmëruar rritje të pakënaqësisë qytetare nëse, sipas tij, situata vijon në të njëjtën mënyrë.
