Gjykata kompetente në Shkup ka caktuar masën e arrestit shtëpiak për ish-zëvendëskryeministrin Artan Grubi, i dyshuar në rastin që lidhet me “Lotarinë Shtetërore”, duke zëvendësuar masën paraprake të paraburgimit për shkak të shqetësimeve për sigurinë e tij personale.
Sipas Prokuroria Themelore Publike në Shkup, masa e re është propozuar pasi i dyshuari është paraqitur vullnetarisht para organeve të drejtësisë dhe ka shprehur gatishmëri për bashkëpunim me autoritetet. Procedura ndaj tij do të vazhdojë, ndërsa ai ka nisur shqyrtimin e materialeve të lëndës.
Prokuroria bëri të ditur se, për shkak të volumit të madh të provave, shqyrtimi do të zgjasë edhe në ditët në vijim, pas së cilës Grubit do t’i jepet mundësia të paraqesë mbrojtjen e tij.
Autoritetet sqaruan se zëvendësimi i paraburgimit me arrest shtëpiak, si dhe konfiskimi i pasaportës, janë propozuar duke marrë parasysh faktin që shumica e provave tashmë janë siguruar, paraqitjen e tij vullnetare dhe indiciet se në njësinë e paraburgimit nuk mund të garantohej siguria e tij. Sipas prokurorisë, shqetësimet përfshijnë edhe anëtarë të familjes së tij.
Pas marrjes në pyetje në prokurori, Grubi është paraqitur para gjyqtarit të procedurës paraprake në Gjykatën Penale.
Ai u arrestua më herët gjatë ditës në pikën kufitare Bllacë dhe fillimisht u transferua në njësinë e paraburgimit në Shutkë, përpara se të dërgohej për marrje në pyetje. Grubi ishte larguar nga vendi në periudhën kur nisën procedurat paraprake në rastin e “Lotarisë Shtetërore”, ndërsa autoritetet kishin vijuar hetimet dhe e kishin përfshirë në listën e personave të kërkuar.
