Gjykata Kushtetuese e Shqipërisë ka vendosur të pranojë kërkesën e deputetëve të opozitës dhe të shfuqizojë rregulloren e re të Kuvendi i Shqipërisë që lidhej me organizimin e komisioneve të përhershme parlamentare.
Sipas vendimit, Gjykata ka konstatuar shkelje në procedurën e përshpejtuar dhe në mënyrën e thirrjes së mbledhjeve, duke vlerësuar se procesi ka cenuar parimin e demokracisë përfaqësuese dhe lirinë e ushtrimit të mandatit nga deputetët.
Gjyqtarët kushtetues arritën në përfundimin se vendimi i Kuvendit është në papajtueshmëri me Kushtetutën, për shkak të shkeljes së rregullave të thirrjes së seancës dhe procedurës së ndjekur për miratimin e rregullores.
Tre ditë pas konstituimit, me 79 vota pro, Kuvendi kishte miratuar ndryshimet në rregullore, duke rritur numrin e komisioneve të përhershme nga 8 në 11. Gjatë votimit, deputetët e opozitës braktisën seancën, duke e cilësuar procesin si “puç kushtetues”.
Një e pesta e deputetëve iu drejtua Gjykatës Kushtetuese, me pretendimin se procesi i miratimit kishte zgjatur vetëm një orë dhe nuk u ishte dhënë mundësia të paraqisnin propozimet e tyre. Nga ana tjetër, Kuvendi argumentoi se kishte vepruar në kushtet e urgjencës.
Me këtë vendim, për momentin numri i komisioneve të përhershme mbetet 8. Kuvendi ka afat 30 ditë nga botimi i vendimit në Fletoren Zyrtare për të ripërsëritur procedurën në përputhje me Kushtetutën.
