Presidenti i Ukrainës, Volodymyr Zelensky, njoftoi se këtë javë në Paris do të zhvillojë takime me partnerët ndërkombëtarë të fokusuar te kriza energjetike, pas ndërprerjeve masive të shkaktuara nga sulmet ruse.
Sipas tij, takimi në formatin “Ramstein” do të përfshijë vendet e Grupit të Shtatë, aleatë nga Evropa Veriore dhe shtetet baltike, si dhe përfaqësues nga SHBA, Kanadaja dhe Bashkimi Evropian.
Zelensky theksoi se miliona qytetarë ukrainas janë përballur me mungesë energjie, uji dhe ngrohjeje për shkak të goditjeve sistematike ruse ndaj infrastrukturës. Takimi zhvillohet një ditë para raundit të ri të bisedimeve të paqes me Rusinë në Gjenevë.
Presidenti ukrainas përsëriti vijën e kuqe të Kievit: Ukraina është e gatshme për kompromise, por nuk do të heqë dorë nga territori.
Ai kërkoi gjithashtu garanci afatgjata sigurie nga SHBA, duke theksuar se Kievi synon një mbështetje që të zgjasë të paktën 20 vjet.
