Ministrat e Mbrojtjes të vendeve anëtare të NATO-s riafirmuan nga Brukseli se mbështetja për Ukrainën vijon të jetë në krye të agjendës së aleancës, edhe pas javësh diskutimesh intensive për sigurinë në Arktik dhe nisjes së një aktiviteti të ri ushtarak në këtë rajon.
Gjatë takimit ministror të së enjtes, aleatët vlerësuan nisjen e operacionit të përforcuar të vigjilencës “Arctic Sentry”, të shpallur një ditë më parë nga Sekretari i Përgjithshëm Mark Rutte. Iniciativa shumë-domenesh synon të koordinojë aktivitetet e 32 vendeve anëtare në rajon, duke i bashkuar ato nën një strategji të përbashkët operacionale.
Plani përfshin stërvitjen daneze “Arctic Endurance”, e fokusuar në rritjen e aftësive të operimit në kushte ekstreme, si dhe stërvitjen norvegjeze “Cold Response”, ku trupat e aleancës kanë nisur tashmë dislokimin. Zhvillimet në Arktik vijnë në një klimë tensionesh, pas deklaratave të presidentit amerikan Donald Trump për Groenlandën, që kishin shkaktuar shqetësime mes aleatëve.
Megjithatë, ministrat theksuan se lufta në Ukrainë mbetet sfida kryesore e sigurisë për aleancën. Infrastruktura civile ukrainase ka qenë objekt i bombardimeve të vazhdueshme ruse, duke lënë qytetarët pa energji elektrike dhe ngrohje në mes të temperaturave të ulëta.
Ministrja e Mbrojtjes e Islandës, Gunnarsdottir, paralajmëroi kundër zhvendosjes së vëmendjes nga fronti lindor. “Nuk mund të lejojmë më pak fokus në krahun lindor”, tha ajo, duke e cilësuar Ukrainën si një vend që lufton për lirinë dhe sovranitetin e Evropës.
Në të njëjtën linjë, ministri finlandez i Mbrojtjes, Antti Hakkanen, kërkoi shtim të presionit ekonomik dhe ushtarak ndaj Rusisë, ndërsa homologu i tij estonez, Hanno Pevkur, theksoi se presioni ndaj Moskës duhet të ushtrohet jo vetëm në fushën e betejës, por edhe në ekonomi dhe shoqëri.
Nga ana e tij, ministri gjerman i Mbrojtjes, Boris Pistorius, deklaroi se pavarësisht tensioneve globale, fokusi i NATO-s do të mbetet në krahun lindor. Ai i cilësoi sulmet ruse ndaj objektivave civile si “terrorizëm kundër popullsisë” dhe bëri thirrje për rritje urgjente të ndihmës.
Në këtë kuadër, Gjermania pritet të përdorë më tej mekanizmin PURL për të financuar sisteme të mbrojtjes ajrore për Ukrainën, një instrument që lejon vendet evropiane të blejnë armë amerikane për Kievin. Edhe Suedia paralajmëroi një paketë të tretë përmes këtij mekanizmi, ndërsa Mbretëria e Bashkuar njoftoi shtesë prej 500 milionë paundësh në ndihmë ushtarake, pjesërisht përmes PURL për interceptorë të mbrojtjes ajrore.
Mesazhi nga Brukseli ishte i qartë: ndërsa NATO rrit praninë në Arktik, lufta në Ukrainë dhe mbrojtja e krahut lindor mbeten prioriteti numër një i aleancës.
