Janë vetëm dy muaj deri në përfundimin e afatit kushtetues për zgjedhjen e presidentit të ri të Kosovës, por deri tani nuk ka pasur bisedime të dukshme ndërmjet partive politike për këtë proces.
Edhe pse moszgjedhja e presidentit brenda afatit do të çonte automatikisht në zgjedhje të parakohshme parlamentare, Lëvizja Vetëvendosje (LVV), partia në pushtet me 57 deputetë, e konsideron çështjen “jo urgjente”. Sipas saj, prioritetet e momentit janë konstituimi i Kuvendit, votimi i Qeverisë dhe miratimi i disa marrëveshjeve ndërkombëtare, përfshirë planin e rritjes së BE-së dhe marrëveshjet me Bankën Botërore. Çështja e presidentit do të trajtohet më pas, brenda afateve kushtetuese.
Presidentja aktuale, Vjosa Osmani, ka shprehur synimin për një mandat të dytë, por kabineti i saj nuk ka bërë të ditura veprime konkrete për sigurimin e përkrahjes politike. Kryeministri në detyrë dhe kryetari i LVV-së, Albin Kurti, nuk ka dhënë garanci për rizgjedhjen e saj, duke ftuar opozitën për një marrëveshje, qoftë për Osmanin apo për një kandidat tjetër konsensual.
Sipas Kushtetutës, presidenti duhet të zgjidhet jo më vonë se 30 ditë para përfundimit të mandatit aktual. Vjosa Osmani u zgjodh presidente më 5 prill 2021, dhe mandati i saj përfundon në prill të këtij viti, duke e bërë procesin politik për zgjedhjen e presidentit një temë kritike në javët në vijim.
