Presidenti serb Aleksandar Vuçiç ka ngritur tonet, duke paralajmëruar lëvizje të forta diplomatike dhe duke shprehur hapur shqetësim për atë që e cilëson si një bosht ushtarak mes Prishtinës, Tiranës dhe Zagrebit.
Nga Mladenovaci, ku mori pjesë në një aktivitet publik, Vuçiç zbuloi se në ditët në vijim do të udhëtojë në Turqi për një takim të rëndësishëm me presidentin Recep Tayyip Erdogan, takim që sipas tij pritet të ketë peshë të madhe për zhvillimet në rajon.
⚠️ “Nuk është thjesht bashkëpunim, por aleancë”
Vuçiç u shpreh se është “shumë i shqetësuar” për afrimin ushtarak mes Kosovës, Shqipërisë dhe Kroacisë, duke pretenduar se nuk bëhet fjalë vetëm për bashkëpunim teknik, por për një strukturë që mund të marrë edhe karakter ofensiv.
Ai tha se Serbia ka informacione të inteligjencës për bisedime që lidhen me drejtime të mundshme sulmi dhe mbrojtjeje, si dhe për përpjekjet e Prishtinës për të siguruar armatim shtesë nga SHBA dhe Turqia.
Megjithatë, ai tentoi të qetësojë opinionin publik: “Qytetarët e Serbisë nuk duhet të shqetësohen – ushtria jonë po forcohet çdo ditë”.
🌍 Ofensivë diplomatike në disa kontinente
Pas Ankarasë, Vuçiç do të marrë pjesë në Konferencën e Sigurisë në Mynih, ku do të takohet me shefin e diplomacisë kineze Wang Yi. Më 15 shkurt, në Beograd pritet presidenti i Azerbajxhanit Ilham Aliyev, me fokus të veçantë te projektet energjetike, përfshirë një termocentral me gaz.
Më pas, presidenti serb do të udhëtojë në Indi për një samit mbi inteligjencën artificiale dhe një takim me kryeministrin Narendra Modi, ndërsa paralajmëroi edhe vizita të tjera nga zyrtarë evropianë dhe një udhëtim në Kazakistan.
💥 Akuza të forta ndaj Kroacisë
Vuçiç hodhi akuza të drejtpërdrejta ndaj Kroacisë, duke thënë se Zagrebi dhe mediat kroate janë të përfshira në zhvillimet politike në Serbi dhe se shpresojnë për ndryshim pushteti. Ai foli edhe për rikthim të ideologjisë “ustashe” në diskursin publik kroat.
🤖 Serbia drejt robotëve humanoidë
Në një deklaratë surprizë, Vuçiç tha se Serbia mund të nisë prodhimin e robotëve humanoidë brenda pesë muajve, nëse sigurohen burime të mjaftueshme energjie, duke theksuar synimin për t’u futur fuqishëm në robotikë dhe automatizim.
