Presidenti amerikan Donald Trump deklaroi se homologu rus Vladimir Putin ka rënë dakord për një ndalim të përkohshëm të sulmeve ndaj Kievit dhe qyteteve të tjera ukrainase për një javë, për shkak të temperaturave ekstreme të ulëta në vend.
Deklarata e tij vjen në një moment kur Rusia është akuzuar se prej vitesh ka shënjestruar infrastrukturën energjetike të Ukrainës gjatë dimrit, si pjesë e strategjisë së luftës që tashmë po hyn në vitin e katërt.
“Personalisht i kërkova presidentit Putin të mos sulmonte Kievin dhe qytete të tjera për një javë dhe ai pranoi,” u shpreh Trump gjatë një mbledhjeje të kabinetit, duke theksuar se i ftohti në rajon është “jashtëzakonisht i ashpër”.
Ai shtoi se shumë persona i kishin thënë se një kërkesë e tillë nuk do të merrej parasysh nga Moska. “Më thanë: ‘Mos e humb telefonatën, nuk do ta pranosh këtë’. Por ai e bëri,” deklaroi Trump.
Deri tani, Rusia nuk ka bërë asnjë koment zyrtar për ekzistencën e një armëpushimi apo pauze të përkohshme të sulmeve. Gjithashtu, nuk është e qartë se cilat qytete të tjera përveç Kievit përfshihen në këtë marrëveshje të pretenduar.
Ndërkohë, parashikimet meteorologjike tregojnë se temperaturat në zonën e Kievit pritet të bien ndjeshëm nga e premtja, me vlera nate që mund të zbresin nën -20°C për disa ditë me radhë.
