Një lëvizje që po bën jehonë në diplomacinë ndërkombëtare: Kroacia ka vendosur të mos i bashkohet nismës së presidentit amerikan Donald Trump për krijimin e të ashtuquajturit “Bordi i Paqes” për Gazën.
Kryeministri Andrej Plenkoviç e bëri të qartë qëndrimin e Zagrebit me një deklaratë të prerë, duke thënë se pas një analize të plotë, qeveria ka vendosur që aktualisht të qëndrojë jashtë kësaj strukture, pa dhënë detaje konkrete për arsyet.
Vendimi vjen pavarësisht faktit se Kroacia ishte ftuar zyrtarisht të bëhej pjesë e bordit që do të drejtohet nga Trump. Më herët, Plenkoviç kishte sinjalizuar se Zagrebi po priste një qëndrim të harmonizuar nga Bashkimi Europian, çka sugjeron se politika e jashtme e BE mund të ketë luajtur rol kyç në këtë refuzim.
“Bordi i Paqes”, i shpallur javën e kaluar nga Trump në Forumin Ekonomik Botëror në Davos, u prezantua fillimisht si një mekanizëm për t’i dhënë fund luftës në Rripin e Gazës. Por ambiciet e tij duket se shkojnë shumë përtej Lindjes së Mesme.
Sipas kritikëve, struktura e re mund të shndërrohet në një qendër paralele pushteti diplomatik, madje duke sfiduar rolin tradicional të Kombeve të Bashkuara në menaxhimin e krizave globale. Pikërisht kjo frikë për një “OKB alternative” ka ndezur debate të forta në skenën ndërkombëtare.
Me këtë qëndrim, Kroacia pozicionohet me kujdes mes aleancave perëndimore, duke shmangur përfshirjen në një projekt që po shihet si i diskutueshëm dhe potencialisht përçarës në arkitekturën globale të sigurisë.
