Lufta në Ukrainë po shndërrohet në një makth me përmasa historike për Moskën. Vlerësimet e fundit nga qendra amerikane e analizës strategjike CSIS hedhin dritë mbi një bilanc humbjesh që ekspertët e përshkruajnë si jashtë çdo precedenti modern për një fuqi të madhe ushtarake.
Sipas raportit, Ukraina ka pësuar mes 500 mijë dhe 600 mijë humbje që nga fillimi i pushtimit në shkallë të gjerë – shifër që përfshin të vrarë, të plagosur dhe të zhdukur. Nga këta, rreth 100 mijë deri në 140 mijë besohet se kanë humbur jetën në luftime.
Por shifrat për Rusinë janë edhe më të rënda. Vlerësohet se deri në 1.2 milion persona janë prekur nga lufta në anën ruse, me rreth 325 mijë të vrarë – një goditje që po lë pasoja të thella në strukturën ushtarake dhe shoqërore të vendit.
Analistët theksojnë se këto të dhëna përputhen me hetime të pavarura nga gazetarë dhe grupe vullnetare që analizojnë burime të hapura, megjithëse numri real i të plagosurve mbetet i vështirë për t’u përcaktuar, pasi shumë rikthehen në front dhe një pjesë e të dhënave mbahen të fshehta.
Raporti nënvizon një fakt të fortë historik: që nga Lufta e Dytë Botërore, asnjë fuqi e madhe botërore nuk ka pësuar humbje njerëzore në këtë shkallë në një konflikt të vetëm. Lufta në Ukrainë, përtej vijave të frontit, po shkruan një kapitull të ri të përgjakshëm në historinë ushtarake moderne.
